CEBU, Philippines – Gipaniguro sa kagamhanan sa lalawigan sa Sugbu nga kasugdan na sa da ling panahon ang bidding ug awarding sa prestihiyosong proyekto sa probinsiya nga mao ang transaxial highway.
Suma pa sa tigpamaba sa Kapitolyo, nga si manlalaban Rory Sepulveda nga dili tinuod nga nahanaw na ang ambisyosong proyekto nga karsada taliwala sa kabungtoran sa lalawigan sa Sugbu nga motadlas gikan sa kinatumyang bahin sa habagatan ngadto na sa kinatumyan bahin sa amihanan.
Gani gitug-an ni Sepulveda nga may pito na ka mga dagkong kompaniya ang mipadayag og kaikag nga motrabaho sa maong proyekto diin usa niini mao ang Strategic Alliance Holding Inc., nga gipangulohan ni manlalaban Aristotle Batuhan ug uban pang mga dagkong kontraktor kinsa nakigtagbo kang Governor Gwendolyn Garcia didto sa Kapitolyo sa miaging adlaw.
Midugang si Sepulveda nga may lain pang duha ka mga foreign investors ang gitakdang mobisita sa gobernador aron susihon ang maong proyekto.
Gitataw ni Sepulveda nga hilom silang naglihok alang sa maong proyekto ug igo nalang nilang gihingpit ang detalyadong plano niini sa pagkakaron.
Si Sepulveda mibutyag usab nga gitun-an nila ang posibilidad sa pagsagop sa Build-Operate-Transfer (BOT) o kaha Joint Investment o Joint Ventures tali sa mahimong kontraktor niini ug sa kagamhanan sa lalawigan.
Apan mipasabot siya nga lahi ang maong kontrato sa gihimo sa dakbayan sa Sugbu bahin sa South Reclamation Project (SRP). - Chester Abadilla (BANAT NEWS)