CEBU, Philippines - Namatay ang usa ka motorista samtang naangol usab ang tulo ka tawo nga miangkas kaniya dihang ang motorsiklo nga ilang gisakyan midumbol sa laing motorsiklo didto sa barangay Poblacion, Danao City alas 10:00 pasado ang takna sa miaging gabii.
Ang namatay mao si Ryan Jaime Gonzales, 18, ulitawo nga taga sitio Langlang sa barangay Cogon, dakbayan sa Danao.
Samtang ang mga naangol mao ang magtiayong si Jaime Manet Moniva, 43, ug ang iyang asawa nga si Ligaya Moniva, 42, ug Legade Moniva, 20, nga anak nilang dalaga nga taga barangay Poblacion sa maong dakbayan.
Si PO2 Ramil Costan sa Danao City Police Station mibutyag sa Banat News nga puwerting kusoga sa dagan sa motorsiklong gimaneho ni Gonzales paingon sa Poblacion sa maong dakbayan.
Apan sa diha na kini sa Poblacion, wala makabantay si Gonzales sa iyang gisunod nga motorsiklo busa nadumbolan niya kini.
Gumikan sa kakusog sa iyang dagan, nalagpot ang biktima ug sa pagtugpa niini napantok ang iyang ulo sa sementadong karsada nga maoy hinungdan sa dihadiha niyang kamatayon.
Wala na makaabot nga buhi sa tambalanan si Gonzales samtang ang magtiayong Moniva ug ang anak nilang dalaga didto dad-a sa Vicente Sotto Memorial Medical Center sa dakbayan sa Sugbo. – BANAT NEWS