CEBU, Philippines - Usa ka pamilya ang nangaangol human gipang-strafing sa wala mailhing mga suspetsado sulod sa ilang panimalay kagahapon sa ala- 1:30 sa kaadlawon sa sitio Ybañez barangay Cayang dakbayan sa Bogo.
Ang amahan nga si Renato Velez, 28, nakaangkon og samad pinusilan sa walang braso ug bugan; samtang samdan usab ang asawa niining si Mirasol, 24, sa tuong kamot ug tuong paa, samtang naagtang usab ang ilang usa ka tuig pa nga anak nga si Janel.
Ang gitumbok nga suspek mao ra usab ang silingan nilang si Elpidio Dahunan, 46, kinsa giimbitar sa kapolisan ug gipaubos sa paraffin test kagahapong adlawa.
Si SPO2 Reynaldo Rosaceña sa Bogo Police Station nga gikahinabi sa Banat News nagkanayon nga ang pamilyang Velez nangatulog pa niadtong higayuna dihang kalit gi-rapido og mga bala ang ilang panimalay sa wala mailhing suspetsado diha sa gawas.
Dali dayong mibiya ang gikatahapan samtang ang mga biktima gidali pagdala sa Severro Verallo District Hospital sa Bogo apan gipabalhin sa tambalanan dinhi sa dakbayan sa Sugbu.
Gisusi karon sa kapolisan ang nahitabong karambola tali sa pamilya sa biktima ug ni Dahunan kinsa giingong ilang gikasukmagay niadong milabay'ng Biyernes nga maoy motibo sa pagpangrakrak.
Ang kaguliyang sa duha ka pamilya nahitabo human pasanginli ang 14-anyos nga anak sa suspek sa 6-anyos nga anak sa mga biktima nga maoy mikawat sa ilang hiniktang manok.
Nakuha sa gawas sa panimalay sa mga Velez ang lima ka kabhang sa .45 ug usa ka slug. Gikatakdang ipatawag ang isig ka habig sa duha ka pamilya alang sa pagpadayon sa imbestigasyon. – BANAT NEWS