CEBU, Philippines – Giawhag ni Barangay Kapitan Zaldy Lumapas sa barangay Umapad, dakbayan sa Mandaue ang kapolisan nga molihok ug dili magmika sa ilang kampanya batok sa illegal nga drugas.
Si Lumapas nga nahinabi sa Banat News miingon nga lisod kaayo alang sa iyang mga barangay tanod ang pagsumpo sa suliran bahin sa pagpayuhot sa ginadiling drugas tungod kay nailhan man sila sa maong lugar.
Matud pa ni Lumapas nga kun mohimo lamang ang kapolisan sa ilang kaakohan sa pagpakgang niining bisyoha, dili gayud unta makahuygo ang illegal nga drugas sa ilang lugar.
Si Kapitan Lumapas miingon nga pipila ka mga sitio sa ilang dapit sa Umapad gihugpaan na sa illegal nga drugas nga naghulga sa kinabuhi sa mga molupyo ilabi na sa mga batan-on.
Matud pa niya nga kun magmika lang ang kapolisan, malagmit mohari na sa dili madugay ang mga negosyante og illegal nga drugas sa Umapad.
Dugang pa niya nga ang mga tigpayuhot og illegal nga drugas sa pipila ka sitio sa ilang dapit dili na mahadlok sa mga mananakop kay gihimo nalang murag isdang baligya ang shabu.
Kini ang hinungdan nga iya usab nga gisangpit ang mga tinugyanan sa Philippine Drug Enforcement Agency (PDEA) 7 nga mohimo’g operasyon sa ilang dapit aron masumpo kining kalihukan sa ginadiling drugas. - Romeo T. Limpangog (BANAT NEWS)