CEBU, Philippines – Usa ka halapad nga clearing operation gisugdan pagpatuman kagahapong adlawa sa Squatters Prevention Encroachment and Elimination Division (SPEED) diha sa kadalanan sa barangay Suba, ning siyudad sa Sugbo.
Mga 50 ka sidewalk vendors sa dalan Magsaysay, Abellana, General Gines, L. Flores, Borres, lakip na ang Pasil Fish Port, Fish Market ang gipangguba.
Gawas sa mga sidewalk vendors gilakip usab pagguba sa mga sakop sa SPEED ang extension sa mga panimalay nga miabot na sa karsada.
Ang SPEED giubanan sa mga barangay tanod ingon man ni Kapitan Joel Sable sa Suba pagpatuman sa clearing operation.
Matud sa kapitan nga siya mismo ang mihangyo sa SPEED nga limpyohan ang kadalanan sa ilang barangay tungod usab sa giingong nagkahagip-ot na nilang kadalanan.
“Daghan man gud nga mga reklamo atong nadawat ba nga magsakay sila og taxi dili na makasulod tungod sa kadaghang naninda daplin sa dalan,” sumala ni Sable. (Elly Bolonos)
Bakasyonista gikuotan, giluba
Usa ka bakasyonista nga nurse wala makabantay nga gidisdisan ang iyang tiyan samtang gikuotan siya sa iyang cellphone sa eskina Sanciangko ug Osmeña boulevard, barangay Kalubihan, ning dakbayan, alas 2 sa miaging hapon.
Si Agela Mae Obach, 37, taga Camague, dakbayan sa Iligan, ug nagbakasyon lamang dinhi sa Sugbo nalandig sa tambalanan tungod sa samad dinunggaban sa iyang tiyan.
Matud ni SPO1 Jay Yballe nga si Obach naglakaw sa naasoy’ng lugar sa dihang kalit lang siyang gibanggaan sa usa ka tawo.
Iya kining giingnan “paghinay diha bay” ug mideretso siya paglakaw padulong sa usa ka establisamento.
Paglabay sa 10 minutos, namatikdan ni Obach nga naminhod ang walang dapit sa iyang tiyan ug sa dihang iya kining gisusi nakita niya kining nagkadugo na. Nakabantay usab siya nga wala na ang iyang duha ka cellphone sa iyang bag.
Apan human sa maong hitabo, mideretso si Obach sa Sacred Heart Parish ug didto nag-ampo sulod sa tulo ka oras aron walay dautang mahitabo kaniya una pa siya miadto sa Visayas Community Hospital aron magpatambal human siya gitambagan sa laing manimbahay nga magpatambal.
Sa laing bahin, usa ka dalaga gitulis sa lima ka wala mailhing tawo sulod sa iyang gisakyan nga PUJ nga may rota nga Mandaue-Cebu City niadtong miaging adlaw.
Ang biktima nga si Michelle Beltran Valmoria, 25, dalaga, taga 4th street Upper Great Plain Subdivision, barangay Bacayan, ning syudad midangop kang SPO1 Marlon Mendoza human mawad-i og Sonny Ericsson nga cellphone nga nagkantidad og P19 mil.
Sumala pa sa imbestigasyon, nasota nga samtang nagsakay si Valmoria sa maong PUJ nga paingon sa dakbayan, adunay misakay nga lima ka tawo nga nagpangedaron og 30 ngadto sa 40-anyos nga mga desente ang pamiste.
Wala makabantay ang biktima nga gihinay-hinay na diay og abli ang iyang sports bag ug didto nakuha ang cellphone. Human niini, naglumba og panganaog sa PUJ ang mga mangunguot. - Lovers Lyn Yangyang (BANAT NEWS)