CEBU, Philippines - Sigurado na nga makadawat sa ilang dugang honorarium gikan sa kagamhanan sa dakbayan sa Sugbu ang dul-an sa 300 ka mga garbage collector sa kabarangayan hangtud sa buwan sa Disyembre niining tuiga.
Kini human aprubahe sa konseho sa siyudad ang resolusyon nga gipalabang ni Konsehal Edwin Jagmoc nga naggahin og kapin sa P9.1 milyones alang sa maong katuyoan.
Ang nahisgutang kantidad idugang sa honorarium sa mga garbage collector sa kabarangayan nga magdawatan lang og ubos sa P5 mil matag buwan.
Dunay 291 ka mga garbage worker gikan sa 45 ka mga barangay sa siyudad ang giingong maoy makadawat sa dugang honorarium gikan sa city government.
Kini tungod sa ilang aktibo nga pagtabang sa Department of Public Services (DPS) pagkolekta sa mga basura sa ilang tagsa-tagsa ka barangay.
Gikinahanglan hinuon sa nahisgutang mga garbage collector sa barangay nga moserbisyo og labing minos walo ka oras matag adlaw.
Ang labaw sa DPS nga si Engineer Dionesio Gualisa maoy gisangunan sa City Council pagmonitor sa maong mga garbage collector.
Sa nasayran, gatusan ka toneladang basura ang makolekta ug mahakot sa mga garbage collector matag adlaw gikan sa nagkadaiyang dapit sa siyudad.
Pinaagi sa pag-abag sa mga barangay garbage worker, giingong nakuha-kuhaan ang gimbuhaton sa mga garbage collector sa DPS.
Una na hinuong gipadayag ni acting mayor Michael Rama nga subling ipatuman sa siyudad ang waste segregation ordinance sa dakbayan sa sunod buwan.
Ubos sa nahisgutang ordinansa, mahimong silutan ang mga molupyo nga dili mo-segregate ug magpataka lang og labay sa ilang mga basura.
Napatuman na ang maong ordinansa kaniadto apan kini wala masustinihi tungod usab sa kakuwang ug nangadaot nga mga garbage truck sa siyudad. – BANAT NEWS