CEBU, Philippines – Patay ang usa ka barangay kagawad sa Olango, lungsod sa Aloguinsan human gibanhigan sa tulo ka mga suspetsado didto sa ilang lugar niadtong Sabado sa kaadlawon.
Ang namatay giila sa kapulisan nga si Kagawad Primitivo Satera Sr. 49, nagpuyo sa nahisgutang lugar human makaangkon og mga samad pinusilan sa iyang kalawasan gikan sa wa matinong armas.
Si PO2 Marlon Pepito, imbestigador sa Aloguinsan Police Station nga gikahinabi sa Banat News nagkanayon nga gikan pa si Satera sa basketbolan sa ilang barangay diin dunay gipahigayong disco pahinungod sa ilang kapistahan kagahapong adlawa.
Dihang mopauli na kini gibana-banang 300 metros ang ilang balay gikan sa basketball court kuyog niini ang iyang anak nga si Vicente Satera, 16, dihang kalit nga gibabagan sa tulo ka suspetsado ug mipaulan kanila og bala.
Ang biktima nahagba dayon ug nagdali sa pag-ikyas ang mga suspek palayo sa nahisgutang dapit, sa gipahigayong follow-up sa mga barangay tanod, usa ka Eleno Barcenilla, 39, nagpuyo sa nahisgutang lugar ang nadakpan sa chief tanod nga si Danny Carang.
Sa gipahigayong follow-up operation sa mga sakop sa kapulisan sa Aloguninsan na-rekober ang motorsiklong dunay kolor nga blue nga binabaye dunay plakang GU 7056 nga gipanag-iya sa usa ka Rey Barcenilla, 21.
Matud pa ni PO2 Pepito nga kagahapong adlawa didto sila sa panimalay sa principal suspek nga si Barcenilla aron sa pagpahibalo sa mga ginikanan niini labot sa krimen apan wala diha si Barcenilla.
Ang anak sa biktima mitumbok kang Barcenilla, ug uyoan ni Barcenilla nga si Eleno uban sa wala mailhing lalaki nga mao ang mibanhig kanila.
Gisubay nga motibo sa kapulisan mao ang panimalos sanglit makadaghang higayon nang gibadlong sa biktima ang suspek tungod sa kakusog niini mopadagan sa iyang motorsiklo.
“Grabe man gud ning makapadagan ang suspetsado diha sa ilang barangay magbahis kanunay hinungdan nga permanenting badlungon sa konsehal, nipahibalo sab ang namatay’ng konsehal nga ipadangat ang reklamo sa session nila sa konseho aron mapitol, ” sumala pa ni PO2 Pepito.
Si Ms. Christine Allir, attending Nurse sa Carcar District Hospital mikumpirmar sa Banat News nga dead-on-arrival si Satera pag-abot sa tambalan.
Apan ang dinakpang si Eleno gikatahong mihimakak sa iyang kalambigitan sa kaso bisan kon positibong giila sa anak sa biktima. – BANAT NEWS