CEBU, Philippines – Hingpit nang did-an ang mga ambulant ug ubang food vendors nga sulod sa Cebu City Hall sugod karong Lunes sumala pa ni City Market Administrator Racquel Bohol-Arce subay usab sa reklamo nga iyang nadawat gikan sa canteen operator sa City Hall.
Giklaro hinuon ni Arce nga iya nang gitigom ang apektadong mga manindahay lakip na niadtong mamaligya og ukay-ukay ug gipahibawo sa reklamo nga iyang nadawat.
“Ang ato ani based on the complaint sa atong canteen operator kay under contract man na siya sa City government,” sumala ni Arce.
Giklaro hinoon sa market administrator nga mahimo gihapong makapaninda ang mga ambulant vendors apan sa gawas na sa City Hall. Partikular nga lugar nga gihatag ngadto sa dul-an sa 20 ka mga manindahay mao ang Gotiaoco building atbang sa City Hall annex building.
Matud ni Arce nga kadtong mga empleyado nga suki sa mga food vendors mao na ang mogawas tungod kay dili na mahimo nga magpahatod niini. Butang nga wala usab mauyoni sa ubang mga kawani nga magdaginot sa ilang budget sa paniudto ug adto mopalit sa mga ambulant vendors.
Gusto sa mga kawani nga dili na sila mahasol ilabi na niadtong anaa mag-opisina sa ikalima ngadto sa ikawalo ka andana sa annex building. - Elly Bolonos (BANAT NEWS)