CEBU, Philippines - Gibutyag ni Cebu 1st District Rep. Eduardo Gullas nga 90 porsiyento sa mga polis dinhi sa nasud dili makamaong molimpyo ug mogamit sa ilang mga armas, si Gullas namulong niini atol sa induction of officers sa Cebu Talisay Aqua City Gun Club Inc. niadtong milabay'ng adlaw.
Si Gullas kinsa maoy inducting officer sa mga bag-ong opisyales sa CTACGCI miawhag sa mga gun club organizations nga tabangan pagbansay-bansay ang kapolisan.
Samtang gihangyo ni Gullas si kanhi Bise Mayor Aberdovey Belleza nga pagamiton sa ilang firing range ug firing range officers ang mga polis aron matudloan sila og maayo kabahin sa paggamit sa ilang mga armas.
Ang tsirman sa kahapsay ug kalinaw nga si Konsehal Arturo Bas giawhag usab sa kongresista nga mosusi sa budgeting sa dakbayan aron makagahin og kaugalingong pundo alang sa pagpalit og mga bala sa mga polis.
Ang maong mga bala maoy gamiton unya sa kapolisan sa dakbayan aron sila magbansay-bansay.
Gihinumduman ni Gullas sa dihang lungsod pa ang dakbayan kaniadto nga duna kini P55 milyones nga Internal Revenue Allotment (IRA) ug karong usa na kini ka siyudad misaka kini gikan sa P155 milyones, P160 milyones ug karon P171 milyones na ang IRA sa Talisay.
Misaad si Gullas kang Belleza ug sa mga sakop sa gun club og P500 mil nga pundo nga gikan sa iyang PDAF (or pork barrel) nga magamit sa development sa CTACGCI.
Si Gullas midugang nga ang Talisay dili masama sa 16 ka dakbayan apil na niini ang Naga, Bogo ug Carcar nga nameligrong mobalik sa pagkalungsod tungod kay iyaha kini panalipdan hangtud sa katapusan.
Ang mga napiling bag-ong opisyales sa CTACGCI mao sila si Aberdovey Belleza, presidente, Bise Presidente Ricky Cabusas, Bise Presidente Externa Anthony Nuñez, Secretary Ronnie Laborada, Treasurer Aaron Capala, Auditor Alfredo Egoy ug mga PRO: Mary Ann Castro, Rogelio Menio, Edward Alesna ug Achiles Abella. - BANAT NEWS