CEBU, Philippines – Patay ang usa ka mananagat human kini mahilo sa ilang gikaong
isdang butete nga kuha sa pagpanagat sa sitio Lahug barangay Antipolo lungsod sa Medillen niadtong Martes sa alas 3 sa hapon.
Ang namatay pag-abot diha sa Verallo District Hospital sa siyudad sa Bogo mao si Lino Palonpon Miro, 27, lumad nga taga Napul-an, Samar apan kasamtangang nagpuyo sa nahisgutang lugar ug pagpanagat ang trabaho niini.
Matud pa ni PO3 Paquito Soon sa Medillen Police dihang nahinabi sa Banat News ang biktima kauban sa iyang mga barkada ug nagluto og butete nga isda nga ilang nakuha sa pagpanagat nianang adlawa.
Human maluto ilaha dayun kining gitabangan og kaon, apan gikatahong bugtong si Miro ra maoy mikaon sa sulod sa ginhawaan sa maong isda samtang ang uban mga unod ra ang ilang gikaon.
Sumala pa ni Soon, dihang ilang gipangutana ang mga kauban niini nga sila si Alexander Velez ug Rodney Pakigay nga nangaon usab sa maong butete uban sa biktima sila mitug-ang gikaon ni Miro ang atay sa maong isda.
Dangtan og pipila ka gutlo namatikdan nilang naluya kini ug diretso og kahagba hinungdan nga nagduda silang nalanag kini ug dali-dali silang miadto sa Severo Verallo District Hospital sa siyudad sa Bogo aron magpahiling.
Apan ang mga doktor sa maong tambalanan mideklarar kang Miro nga dead on arrival.
Nagduda sila si Velez ug Pakigay nga ang nakahilo kang Miro mao ang atay sa butete sanglit silang nangaon sa unod niini wala man dayo'y gipamati human makakaon.
Sumala pa sa mga eksperto, ang butete nga gitawag sa Englis og pufferfish o blowfish gikunsiderar nga ikaduhang labing makahilong mananap sa tibuok kalibutan, ikaduha lang sa usa ka matang sa baki nga makahilo usab.
Ang butete dunay kemikal nga gitawag og tetrodotoxin nga gihulagway nga makamatay gyud kun makaon. Kini anha makit-an sa iyang atay, obaryo ug sa panit ug wala pay bisan unsang tambal nga nadiskubre pangontra niini.
Sumala pa nga ang maong hilo kun makaon moresulta sa pagkaparalisa sa kaugatan ug kaunuran sa tawo ug mosunod dayon ang paglisod pagginhawa ug kun di dayon mahatagan og oxygen mamatay ang biktima sa gitawag og asphyxia kun pagpalyar sa lawas paglanghab og hangin.
Gumikan kay wala pay tambal alkontra niini gawas nga kinahanglang madala dayon sa tambalanan aron mahatagan dayon og oxygen ang biktima hangtud nga molurang ang kaisog sa hilo.
Dunay usa ka matang sa butete nga sikat nga pagkaon alang sa mga Hapones nga gitawag og fugu, apan eksperto ug mainampingon ang mga kusinero niini pagkuha sa mga parteng dunay hilo una pa nila kini lutuon.
Apan ang Bureau of Fisheries and Aquatic Resources kaniadto pang mipahimangno sa publiko nga gidili gyud ang pagkaon niini gumikan sa peligrong nagpaabot sa makakaon niini. - BANAT NEWS