CEBU, Philippines - Usa ka polis nga bag-uhay pang mitan-aw sa boksing nila ni Nonito "The Filipino Flash" Donaire ug Brian "The Hawaiian Punch" Viloria niadtong Domingo sa buntag ang naangol human madasmag ang gisakyang motorsiklo sa laing motorsiklo sa sitio Bahada barangay Poblacion lungsod sa San Remegio.
Ang naangol mao si PO2 Edgar Perez, taga barangay Antipolo lungsod sa Medillen apan kasamtangang nadestino sa San Remegio Police.
Matud pa ni PO2 Yuri Colonia sa San Remegio Police dihang nahinabi sa Banat News, si PO2 Perez off-duty na nianang adlawa apan wala modiretso og uli kay mitan-aw pa kini og salida sa boksing sa duha ka Pilipinong boksidor(ang duha pulos mi-KO sa mga kontra).
Apan gumikan sa kadaghan sa mga patalastas sa matag karon ug unya sa maong boksing gipul-an kini ug nakahukom nalang nga mopauli.
Samtang nagdagan pauli, pag-abot diha sa maong dapit kalit nga may laing motorsiklong gimaneho ni Melchor dela Peña Forrosuelo, 36, taga barangay Punta ang milugwa sa iyang agianan hinungdan nga nadasmagan niya kini.
Si Perez maayong pagkalamba sa kalsada hinungdan sa iyang mga pangos sa duha ka tiil ug gidala dayon sa Severo Verallo District Hospital sa siyudad sa Bogo ug luwas na sa peligro. - Darrel Carumba (BANAT NEWS)