Cebu Philippines - Patay ang usa ka sakop sa Lupong Tagapamayapa apil na ang duha niya ka mga anak human gisulong sa armadong mga lalaki ug gipamusil sa ilang balay didto sa Sitio breeding barangay Cantuod lungsod sa Balamban niadtong Domingo sa alas 7 sa gabii.
Ang mga biktima nga pulos patay dihadiha ug nakaangkon og daghang mga samad pinusilan mao ang amahan nga si Macario Lumayno, 70, minyo, usa ka mag-uuma ug sakop sa Lupong Tagapamayapa sa maong barangay ug duha niini ka mga anak nga sila si Melvin Lumayno, 26, minyo ug Jomar Lumayno, 30, usa ka technician, pulos mga molupyo sa nahisgutang lugar.
Duha ngadto sa tulo ka mga suspek nga gihulagway sa mga nakasaksi nga nagtaptap sa ilang nawong ang responsable sa krimen.
Matud ni PO3 Rolando Navarro sa Balamban Police Station sa dihang nahinabi sa Banat News ang biktima nga si Melvin nagkaon kini sa panihapon sa gawas sa ilang balay ug kalit lang mitunga ang mga armadong lalaki ug dayung pusil kaniya.
Si Melvin nga nakaangkon og mga samad pinusilan nakahigayon pa kini og dagan ngadto sa pinuy-anan sa iyang ginikanan sa tupad sa ilang balay dungan ang pagsinggitsinggit sa pagpangayo og panabang ug nahagba kini pag-abot sa pultahan.
Ang amahan nga si Macario ug anak nga si Jomar nga nakadungog sa singgit ug sunodsunod nga boto sa armas daling migawas ug pag-abli nila sa pultahan sila na usab ang gipa-uwanan og mga bala sa mga suspek.
Si Melvin nakaangkon og samad pinusilan sa iyang dughan, abaga, tiyan nga milapos sa bukobuko, samtang ang igsuon niining si Jomar nakaangkon og samad pinusilan sa wala ug tuo niyang tiyan, abaga ug ubos sa dughan samtang ang ilang amahan nga si Macario nakaangkon og samad pinusilan sa dughan nga milapos sa bukobuko.
Pagkahagba sa mga biktima misibat sab dayon pahilayo ang mga suspek ug pag-abot sa miresponde nga mga polis pulos nagbuy-od nga nagkadugo ug mga patay na ang mga biktima.
Ang kapolisan naka-recover og lima ka basiyo sa bala sa kalibre .45 ug tulo ka buhing bala, ingon man usa ka magazine sa kalibre .45 nga dunay sulod nga pito ka mga bala, usa ka slug sa .45 ug laing usa ka bala sa .9mm pistol.
Matud ni PO3 Navarro padayon pa karon ang ilang imbestigasyon pagtumbok sa mga suspek ug sa motibo sa krimen.
Matud ni PO3 Navarro ang biktima nga si Melvin una na kining napriso duha ka bulan na ang milabay tungod sa kaso nga pagpangumot og totoy sa usa ka 16 anyos nga dalagita sa merkado sa lungsod apan nakagawas kini human wala mohinayon pagpasaka og kaso ang reklamante.
Dugang nahipos nga impormasiyon sa kapolisan nga nag-atubang na usab si Melvin kaniadto og mga kaso nga pagpangulata ug mao kini apil sa gitutokan sa nagpadayon nga imbestigasyon.