CEBU, Philippines - Wala na kabangon sa gihigdaang nitso ang usa ka menor de edad sa dihang giligo kini og bala sa lima ka mga batan-on kagahapon sa kaadlawon sulod sa Chinese Cemetery barangay Carreta ning dakbayan.
Si Mark Joseph Barrientos,17, molupyo sa dalan F. Villa barangay T. Padilla ug anha na manginabuhi sa maong sam-ang nakaangkon og daghang samad pinusilan sa kalawasan nga nakaingon sa hinanali niining kamatayon.
Gipangita pa sa kapolisan ang lima ka wala mailhing mga lalaking gitumbok nga maoy mipusil sa biktima samtang kini natulog diha ibabaw sa usa ka lubnganan.
Sa imbestigasyon sa kapolisan nakit-an nalang ang patay'ng lawas sa biktima nga nag-ubo na ug nagkadugo diha sa lugar.
Sa pakisusi sa kapolisan sa crime scene nakuha ang walo ka bolitas nga gituohang gikan sa lawas sa biktima nga milapos, dako ang pagdudang mga sakop sa gang ang mga suspek ug posibleng dunay atraso si Barrientos kanila maong gipatay.
Nagduda ang kapolisan nga posibleng usa ka pugakhang ang gigamit sa mga suspek.
Sa laing bahin, laing batan-on ang gidunggab sa buko-buko sa laing batan-on samtang naglakaw diha sa dalan Colon gikan sa disco kagahapon sa kaadlawon.
Ang 15-anyos nga menor de edad nga taga sitio Epil-Epil barangay Capitol site miila sa suspek nga giila lang niya sa pangalang “Cha-Cha” nga molupyo usab sa barangay Capitol Site.
Nagtaop pa sa buko-buko sa biktima ang siyam ka pulgadas nga kutsilyo diha sa Cebu City Medical Center.