CEBU, Philippines - Nag-ungot pa ang bala sa lawas sa usa ka polis sa Mandaue City Police Office nga gipusil didto sa lungsod sa San Remigio kagahapon sa kaadlawon.
Ang biktima mao si PO1 Pasaylo Bandolon, 45, minyo ug lumad sa lungsod sa San Remigio ug nadestino sa Opao Police Station.
Matud pa ni PO1 Bruce Taneo, desk officer sa station 5 nga sa milabay’ng adlaw misang-at og leave sa iyang trabaho si POI Bandolon alang sa pagtambong sa lubong sa iyang uyoan didto sa San Remigio.
Kagahapon mga alas 2 sa kaadlawon nag-atang og sakyanan si PO1 Bandolon padulong na unta dinhi sa dakbayan sa Mandaue alang sa iyang pagbalik sa serbisyo kalit lamang kining gipusil sa makadaghan sa usa ka wala mailhing tawo.
Si Bandolon nga nakahiagum og unom ka samad pinusilan gidali og dala sa tambalanan sa Perpetual Soccur Hospital diin usa sa bala mi-ungot sulod sa lawas hinungdan nga kini ipa-ubos sa operasyon.
Matud pa ni Bandolon dili gyud siya makaila sa maong mipusil kaniya gumikan sa kangitngit sa maong dapit diin siya nag-atang og sakyanan.
Ang kapolisan sa San Remigio padayon pa sa ilang imbestigasyon ug pag-ila sa responsable sa maong krimen. - Bong Soriano (BANAT NEWS)