CEBU, Philippines - Mga residente sa duha ka barangay sa lungsod sa Minglanilla nagbagulbol kabahin sa pagpangubkob og balas ug graba sa sapa sa barangay Manduang.
Samtang ang mga residente usab sa barangay Pakigne nagbagolbol usab tungod kay nangaguba na ang karsada diha sa ilang barangay ug ilang gipasanginlan ang mga dagkong truck nga gikargahan sa mga graba ug balas gikan sa Manduang diha agi sa Tubod Road sa Pakigne padulong saka.
Si SPO4 Remegio Elacion, officer-in charge sa Minglanilla Police Station sa pakighinabi sa Banat News kagahapon nagkanayon nga wala sila’y nadawat nga reklamo kabahin sa giingong pagpangubkob og balas diha sa barangay Manduang.
Apan duna hinuoy reklamo gikan sa kapitan sa barangay Tungkop nga si Olga Fiel kinsa mianha kagahapon sa hapon sa ilang buhatan aron mangayo og police assistance tungod kay aduna silay gidakop nga nangubkob og balas diha sa sapa sa iyang barangay.
Gibutyag ni Elacion nga ang mangubkob og balas diha sa Manduang walay permit gawas lang sa mangubkubay diha sa barangay Guindarohan nga gitawag og “concession area” nga gihatagan og permiso nga makubkuban og balas ug mga graba.
Matud usab niini, kaniadto dunay mga reklamo diha sa barangay Cuanos kabahin sa pagpangubkob gihapon og mga balas diha sa sapa apan wala gibutyag ni Elacion kung nasulbad na ba ang maong problema.
Ang Banat News wala makakuha og pamahayag kabahin sa maong problema gikan kang Konsehal Robert John Selma kinsa maoy tsirman sa kalikupan tungod kay atoa kini sa biyahe mitambong og conference. - Brenda Batuto (BANAT NEWS)