CEBU, Philippines - Mihiwasa sa kapungot si Mayor Jonas Cortes gumikan kay haligi ray nakita niya sa gipatukod nga edipisyo alang sa fire substation sa barangay Basak, dakbayan sa Mandaue.
Naglagot si Cortes tungod sa maong lugar daghan kaayong panimalay unya walay fire substation nga makatubag dayon kun may sunog.
Miingon si Cortes nga adunay P2.5 milyones nga gahin alang sa gitukod nga edipisyo sa fire substation gikan sa Priority Development Assistance Fund (PDAF) ni Senador Juan Miguel Zubiri.
Apan pagsil-ing ni Cortes niadtong miaging adlaw, mikulisiw sa kasuko ang mayor dihang pulos ra haligi ang nagbarog sa maong dapit ug wala masayod ang mayor kun hain na paingon ang kuwarta nga gigahin ni Zubiri para sa maong proyekto. - Romeo Limpangog (BANAT NEWS)