CEBU, Philippines - Mihagit ang hepe sa demolition team sa siyudad sa Sugbu nga si Vicente Mercado ngadto kang Urban Poor Consultant Gerry Marquez nga tinud-on ang gisulti niini pagluwat sa katungdanan kun mapamatud-ang siya maoy hinungdan nga midagsa ang mga street vendors sa kadalanan.
Kahinumduman nga una nang gibutyag ni Marquez nga moluwat siya sa katungdanan kung mapamatud-an ni Mercado nga siya maoy nakaingon sa pagdaghan sa mga sidewalk ug street vendors.
Sa sayo pa, gipasanginlan ni Mercado si Marquez nga maoy mipahimutang sa ubang mga manindahay daplin sa kadalanan sa dakbayan nga gihulagway sa uban nga nasusama na sa uhong nanurok.
Butang nga hugot usab nga gipanghimakak sa consultant ug mihagit kang Mercado nga mopakita og kamatuuran sa pasangil niini.
Apan matod sa hepe sa demolition team nga daghan ang iyang mga ebidensya nga mopamatuod sa iyang akusasyon batok sa urban poor consultant.
Dugang niini niingon si Mercado nga si acting mayor Michael Rama mismo nakadawat usab og suwat-reklamo labot sa pagbutang ni Marquez og sidewalk vendors.
Gani nagkanayon ang hepe sa demolition team nga andam niyang hatagan si Marquez og kopya sa report sa ilang operation ug inspection section team labot niini.
Kung mahinumduman nga giakusahan ni Mercado si Marquez kaniadto nga nisapaw sa gimbuhaton sa demolition team. Kini tungod usab sa giingong pagtukod sa consultant ug kaugalingong demolition team ug mopahigayon usab og kaugalingong clearing operation. - Elly Bolonos (BANAT NEWS)