CEBU, Philippines - Usa ka gisuspetsahang mangunguot naunay pagsikop sa iyang gikuotan sulod sa jeep nga pasaheroan didto sa barangay Maguikay, dakbayan sa Mandaue kagahapon.
Ang nadakpan mao si Rolando Lozano, alyas Roger Cortes nga taga Bakilid, dakbayan sa Mandaue apan lumad nga taga Jubay, Liloan, Cebu.
Si PO1 Godofredo Alingay nga nahinabi sa Banat News miingon nga nagsakay og PUJ ang biktima kinsa wala magpaila, (kay usa kini ka mananakop), dihang sa paghinol niya sa iyang pitaka nga may sulod nga P7,000, kay mohatag og plete, nahanaw na kini sa iyang bulsa sa likod.
Si Lozano nga maoy gikatupad sa biktima maoy iyang gisikop apan sa pagrikisa niya niini, wala na sa kamot niini ang pitaka kini tungod kay gipasa diay ngadto sa iyang kaubang mangunguot.
Dugang pa ni PO1 Alingay nga ilang nasayran gikan sa cellphone sa dinakpan nga ang kauban adto magpaabot sa SM human sa ilang gihimong pagpanguot sa PUJ.
Gitanggong sa kapolisan ang suspetsado apan ang wala pa hiilhing kauban niini, ila pang gipangita. – BANAT NEWS