CEBU, Philippines - Wala mahadlok sa mga panguros ang usa ka liso og pangisip hinungdan nga puwerting lisanga sa pari nga nadestino sa simbahan sa Mother of Perpetual Help sa barangay Jaclupan, dakbayan sa Talisay kay ang maong lalaki kinsa giingong may deperensiya sa pangisip nagsuroy-suroy sa sulod sa simbahan ug gi-gisi niini ang “mass guide booklet” , ug buot pa untang hikugan ang usa ka rebulto sa birhen, dayon mo misa pa gyud unta kini, niadtong Biyernes Santo sa kaadlawon.
Si Padre Padre Nestor Atillo kinsa mikurog sa hilabihang kahadlok, mitawag dayon sa kapolisan sa Talisay ug nangayo og panabang.
Si SPO1 Joel Wenceslao, PO2 Francisco Gorosin ug PO1 Juilo Cañolas kinsa daling miresponde sa maong tawag misikop sa suspetsado nga si Jolito Labajo, 31, nga taga Jaclupan.
Si Wenceslao mibutyag sa Banat News nga naingon niadto si Labajo kay may deperensya ang iyang utok, base sa gibutyag sa mga igsoon niini .
Matud ni Wenceslao nga ambot unsa kahay gikalagotan ni Labajo nga gisuwayan man usab unta sa paghigot og pisi ang li-og sa rebulto sa Birhen, ug ang krus nga gipahigda, iyang gipabarog diha taliwala sa simbahan.
Unya wala pa matagbaw, misuway na unta kini sa pagmisa, maayo nalang kay mipatuo sa ilang alam-alam ug ila kining gidala sa police station aron dili makasamok sa mga nanimba.
Matud pa sa kapolisan nga ang gihimo ni Labajo wala masanta sa mga panguros nga gihimo sa pari ug sa mga nanimbahay niadtong tungora. – BANAT NEWS