CEBU, Philippines - Gitinguha na usab karon sa kadagkuan sa Cebu City Jail nga marehistro ang tanang piniriso diha sa nahisgutang bilanggoan ug makabutar sa umaabot nga eleksyon.
Partikular na niadtong mga inmates nga wala pa maabsuwelto o makonbikto ug padayon pang gitaral ang mga kaso niini sa hukmanan.
Matud ni City Jail Warden Superintendent Efren Nemenio nga nakapadala na sila og suwat-hangyo ngadto sa rehiyonal nga buhatan sa Comelec alang niini.
Malaumon ang jail warden nga mosugot ang Comelec sa ilang hangyo tungod kay giingong nakaparehistro na sila og mga piniriso sa nangaging continuing registration.
Miingon si Nemenio nga bugtong kalainan lang sa ila karong hangyo mao nga gusto nilang ang Comelec na maoy moduol sa City Jail.
“Ang amo man gung hangyo nga dunay ipahigayong satellite registration diri sa bilanggoan kay aron dili ta kaayo mahasol,” sumala ni Nemenio.
Dugang request ni Nemenio sa Comelec nga kadtong inmates nga mukapin na sa unom ka buwan sa City Jail pag-abot sa piniliay, anha na iparehistro sa barangay Kalunasan.
Sa kasamtangan, ang City Jail dunay 1,988 ka piniriso ug 80 porsiyento niini ang giingon ni Nemenio nga padayon pang nagpaabot sa desisyon sa ilang kaso.
Kahinumduman nga sa nakalabay nga piniliay, kapin sa usa ka gatus ka mga inmates ang nakabutar sa ilang tagsa-tagsa ka presinto.
Nasayran nga dunay kapin sa 53, 350 ka mga inmates ang anaa karon sa nagkadaiyang mga bilanggoan sa nasud base usab sa talaan sa Bureau of Jail Management and Penology.
Mga 95 porsiyento niini ang giingong padayon pang nagpaabot sa husay ug disisyon sa ilang mga kaso nga maoy gitinguha usab sa Commission on Human Rights nga marehistro. – BANAT NEWS