CEBU, Philippines - Wala pa madeklarar sa barangay San Antonio ning siyudad sa Sugbu nga ubos sa State of Calamity ang dapit sa barangay nga nasunugan.
Kini maoy giangkon sa numero unong konsehal sa San Antonio, Ruben Raña, tungod kay giingong nagbakasyon pa ang ilang barangay kapitan nga si Allan Masecampo.
Matud ni Raña nga si Masecampo tua pa sa isla sa Bantayan ug gipaabot nga mahibalik sa Sugbu karon o ugma pang adlawa una pa sila makahimo og desisyon kabahin niini.
Sukwahi sa San Antonio, dali hinuong napaubos sa state of calamity ang dapit sa barangay Santa Cruz nga lakip nga gilamoy sa kalayo niadtong miaging Martes.
Matud ni Kapitan Jerome Lim, human sa nahisgutang sunog gitigom niini ang mga kagawad sa barangay ug nauyunan nga ideklarar ang dapit nga calamity area aron mapagawas ang ilang P190 mil nga calamity fund pagtabang sa mga biktima.
Nasayran gikan kang Lim nga moabot sa 31 ka pamilya ang nasunugan sa ilang barangay lakip na ang mga nag-abang.
Samtang sa barangay San Antonio, moabot usab sa 36 ka pamilya ang nalista sa Department of Social Welfare and Services (DSWS).
Sa pikas bahin, ang konseho sa siyudad gitakda usab nga mopalabang og resolusyon nga magdeklarar sa mga dapit nga nasunugan ubos sa state of calamity.
Ang nahisgutang sunog niugdaw sa 28 ka mga pinuy-anan nga naglakip sa mga boarding houses ug gibana-banang nidanyos og P12.5 milyones. (Elly Bolonos) (BANAT NEWS)