CEBU, Philippines - Miulbo ang dakong sunog kagahapon sa hapon nga miresulta sa pagkaugdaw sa kabalayan diha sa dalan R.R. Landon sa barangay Sta. Cruz nga mitabok ngadto sa silingang barangay sa San Antonio.
Ang maong sunog giisa dayon ngadto sa general alarm ni city Fire Marshal Ismael Codilla gumikan sa kakusog sa hangin ug kasikit sa mga panimalay nga kasagaran binuhat sa light materials.
Sumala pa sa base control sa kabumberohan sa dakbayan ang sunog gialarma alas 5:44, gideklarar kining nakontrolar human sa usa ka oras ug onse ka minutos (6:55) na sa gabii.
Ang kabumberuhan sa siyudad sa Mandaue, Talisay, Lapulapu, Naga ug sa Consolacion miapil sa pagresponde lakip na usab ang mga miyembro sa Emergency Rescue Unit Foundation, Filipino-Chinese Fire Brigade ug Santo Niño Fire Volunteers.
Gumikan sa maong sunog nangatanggong ang mga sakyanan nga nagsubay sa dalan R. Landon ug Junquera lakip na ang mga sumasakay gumikan sa mga nagpundong mga fire trucks sa dalan.
Si Insp. Maria Catherine Veloso ang Battalion Commander sa nag-duty nga mga bombero kagahapon sa pakighinabi sa Banat News sa telepono nagkanayon hasta ang dapit duol sa Philippine Drug Enforcement Agency-7 ug Cebu Normal University ilahang gibutangan daan og mga fire trucks aron sa ingon mapugngan dayon ang kalayo kun mahitabo mang maabot kini didto.
Ang mga nasunugan atol ning pagsulat sa balita nagpasad diha sa kadalanan palibot sa nasunog nga dapit samtang giandam na usab sa Cebu City Disaster Coordinating Council pinanguluhan ni Konsehal Gerardo Carillo ang mga hinabang alang kanila.
Apan sa initial nga pagbana-bana ni Codilla sa report sa DyAB mokabat sa P12.5 milyones ang danyos gikan sa di momenus 25 ka mga panimalay nga naugdaw.
Samtang gumikan sa maong hitabo napugos pagpagawas ang Police Regional Office -7 ingon man sa PDEA sa ilang mga gamit kini bisan paman dunay firewalls nga nag-ulang kanila gikan sa residential area.
Gisusi na karon sa mga fire investigators ang report nga diha magsugod ang kalayo sa panimalay ni Eusebio Alu Jr. sa Alu Compound sa R.R. Landon.
Apan si Eusebio Alu Jr. dihang gihinabi sa mga tigbalita kagahapon mihimakak niini ug nagkanayon nga nabantayan nila ang kalayo diha magsugod sa panimalay sa iyang uyuang si Angelo Alu.
Matud pa niya dihang ilang gisusi nagsiga na ang kisame sa first floor ug mikalit og dako ang kalayo hinungdan nga nagdali sila sa panggawas ug walay bisan usa ka butang nga nasalbar.
Sumala pa ni Eusebio diha palang sa ilang compound pito ka balay na sa ilang kaliwatan ang nangaugdaw.
Wala pa usab hinuon matino sa mga imbestigador kun unsay sinugdanan niini. - Uban sa report nilang Edwin Ian Melecio, Guam Logroño ug AJ dela Torres a The Freeman (BANAT NEWS)