CEBU, Philippines – Walay tinguha ang konseho sa dakbayan sa Mandaue sa pag-override sa gi-vetohan ni Mayor Jonas Cortes nga mga ordinansa bahin sa pagkuha daan og legislative franchise sa tanang legal nga sugal sa dakbayan sa dili pa kini katugotan sa ilang operasyon, ug sa pagdili pagsul-ob sa crash helmet nga motabon sa nawong sa mga motorista.
Si Mayor Cortes mipasabot nga iyang givetohan ang maong mga ordinansa kay misimang kini sa gipatuman nga nasudnong balaod.
Matud ni Cortes nga sumala sa balaod ,ang kagamhanang nasudnon lamang ang adunay katungod sa pagkolekta og buhis sa tanang legal nga mga sugalan.
Mao gihapon ang ordinansa nga nagdili sa mga motorista sa pagsul-ob og crash helmet nga motabon sa nawong, puwerting pagkasimanga niini gikan sa orihinal nga balaod sa nasudnong kagamhanan, tungod kay ang pagtabon og helmet sa dagway sa usa ka motorista, iyaha kanang katungod aron dili magusbat ang iyang ulo ug nawong kun madisgrasya siya.
Apan mihiwasa si Fortuna sa gipahayag sa mayor sanglit alang kaniya wala gyud mosimang ug mosukwahi sa nasudnong balaod ang ilang ordinansang gipalabang. (Romeo Limpangog) (BANAT NEWS)