CEBU, Philippines - Dili madawat sa menor de edad nga rape-victim nga himuon na lang child abuse ang kaso nga iyang gipasaka batok sa director sa Boy Scout of the Philippines dinhi sa tunga-tungang Kabisay-an nga si Alexander Kong III.
Nasurpresa ang biktima lakip na ang iyang abogado human masayod sa rekomendasyon ni investigating prosecutor Victor Laborte tungod kay nasayran niini nga ang unang piskal nga nihupot sa rape case batok ni Kong nakakita og igong kapasikaran pagpasaka sa maong kaso ngadto sa korte.
Ang labaw nga gikadismaya sa kampo sa biktima tungod kay wala sila makadawat og kopya sa orihinal nga resulusyon ni piskal Lineth Lapinid.
Mao na lay ilang nasayran nga miduso na og motion for reconsideration ang suspetsado pinaagi sa iyang abogado labot sa rekomendasyon ni Lapinid.
Apan didto na napunta kang prosecutor Laborte ang mosyon ni Kong dihang wala na mopadayon paghupot niini ang unang piskal sa maong kaso.
Gibasura ni piskal Laborte ang unang rekomendasyon ni Lapinid ug mihimo og lain nga pasakaan nalang og kasong child abuse batok sa suspetsado ngadto sa hukmanan.
Butang nga dili madawat sa menor de edad nga biktima ingon man sa legal counsel niini nga si Atty. Ruphil Fernandez Bañoc.
Sa ilang gisang-at nga motion for reconsideration ilang giinsister nga duna gyu’y nahitabong pagpanglugos sa menor de edad ug dili lang yano nga child abuse.
“Unsa man diay tawag anang gipugos pagpasulod ang kinatawo sa suspetsado ngadto sa kinatawo sa biktima, naa man tay lig-ong mga ebidensya ana,” sumala pa ni Bañoc.
Sa samang higayon gipangayo usab sa gidusong mosyon sa reklamante nga hatagan og kopya sa una ug orihinal nga resolusyon ni piskal Lapinid. Labaw sa tanan, gipangayo usab sa kampo sa biktima nga mo-inhibit si piskal Laborte pagresulbar sa ilang gidusong mosyon.
Ang 17 anyos na karon nga rape-victim nanghinaut nga mahatag kaniya ang iyang gipangita nga hustisya ug mabilanggo sa tibuok kinabuhi ang suspetsado.
“Manghinaut ko nga makunsensya ang piskal ug makab-ot nako ang hustisya sa akong gidangatan,” tipik sa pamahayag sa biktima dihang nahinabi sa Banat News. - Elly Bolonos (BANAT NEWS)