CEBU, Philippines - Nadakpan sa kapulisan sa akto ang usa ka notadong drug pusher nga bag-ohay pang nakagawas sa bilanggoan samtang giingong namaligya og shabu sa atubangang bahin sa eskuwelahan sa barangay Villadolid siyudad sa Carcar niadtong Martes sa 1:10 sa hapon. Ang suspek giilang si Richard Ombay, 37 kinsa nakuhaan og 25 ka gagmayng paketeng mayb sulod nga gituohang shabu og kwarta nga gituohang halin nga moabot og P770.00. Matud pa ni PO1 Alex Buanghog sa Carcar City Police may mitawag kanila ug misumbong kabahin sa presensya ni Ombay hinungdan nga giadto kini sa grupo ni SPO1 Meliton Agadier og mga kaubanan. Matud pang Buanghog nadakpan ug nabilanggo na usab si Ombay niadtong 2007 tungod sa pagpamaligya og illegal drugs. - BANAT NEWS