CEBU, Philippines - Nagsugod na ang ubang ahensya sa gobiyerno paghimo’g lakang alang sa ilang pagpangandam nunot sa gipaabot nga pagdasok sa mga sumasakay sugod karung adlaw’ng Domingo gumikan sa kini sa pagtimaan sa Semana Santa karung sunod semana.
Ang Philippine Coast Guard (PCG) inabagan sa nagkadaiyang ahensya sa gobiyerno mopatuman na sa ilang “Oplan Kalakbay 2009” “Garantisadong Tulong (GT) PROJECT O “Oplan Semana Santa” ubos kini sa kamanduan sa Department of Transportation and Communication (DOTC)
Ang PCG pinaagi sa Coast Guard District Central Eastern Visayas nga nagkober kini sa mga pantalan sa Rehiyon Siyete ug Otso sama sa Cebu, Dumaguete, Bohol, Maasin, Ormoc, Catbalogan ug Tacloban magbutang og Passenger Assistance Center (PAC) O help desk gikan sa Abril 5 hangtud sa umaabot Abril 12 agig timaan sa tradisyonal holy week celebration.
Tag duha ka representante ug mga volunteers maoy pabantayon sa help desk gikan sa PCG, Marina, Philippine Ports Authority (PPA) Cebu Ports Authority (CPA) ug (PCGA) uban pang ahensya ug non-government organization ug mga shipping companies.
Kini aron serbisyohan 24/7 kadtong mga sumasakay nga makasugat sab og problema diha sa tanang pantalan sa Central-Eastern Visayas.
Ang mga personel sa help desk maoy gitahasan sa pagpanawat og problema, request for assistance, complaints of the riding public, and minor medical service nga masugatan sa mga sumasakay diha sa pantalan.
Sila sab ang mangitag paagi nga masulbad ang problema nga masugatan sa mga sumasakay ngadto sa hingtungdan shipping company.
Duna say ipamutang nga K-9 nga iro sa ganghaan sa pantalan ug sud sa pantalan aron masigurong walay makalusot nga mga sumasakay nga nagtinguhang mopalusot og iligal nga kargamento nga dad-on ngadto sa ilang probinsya. - ReyPasaporte (BANAT NEWS)