CEBU, Philippines - Ang kadagkuan sa Dangerous Drugs Board (DDB) mopahigayon og Visayas Inter-Agency Conference karong 21-22-23 sa sunod bulan nga ipahigayon diha sa Waterfront Mactan sa dakbayan sa Lapulapu.
Kini maoy gipahibalo ni acting DDB chairman Atty. Clarence Paul Oaminal sa dihang nahinabi sa Banat News subay ning hugot nga kampanya sa ilang buhatan paggukod niadtong mga nalambigit sa illegal nga drugas.
Matud pa ni Oaminal nga ang maong kalihukanpagatambungan sa mga representanti gikan sa rehiyon 6, 7 ug 8 diin sa matag ka rehiyon dunay 10 ka mga huwes nga motambong, 10 ka mga piskal, ug 10 usab ka mga sakop sa kapolisan.
Sumala pa niini nga tumong ug tuyo sa maong conference mao ang ilang pagpangita'g sulosyon sa pagpatuman sa mga balaudnon may kalambigitan sa drugas.
Kini isip kabahin sa ilang pagtaral niadtong mga nalambigit sa ilegal nga drugas diin sagad sa mga madakpan sa kapolisan maabsuwelto sa kaso.
Gipasabot niini nga pinaagi sa Visayas Inter-Agency nga programa aduna na sila'y mga insaktong sistima nga dili masayang ang paninguha sa kapulisan sa pagtaral niadtong mga nalambigit sa drugas.
Giklaro niini nga daghang mga provision sa Republic Act 9165 nga nailang Comprehensives Dangerous Drugs Act of 2002 nga wala gayud masabti sa kapulisan ug wala mapatuman sa piskaliya.
Gidugang pa niini nga bisan tuod kun limitado ang resources sa mga law enforcer apan kun tarungon lang gayud sa pagsunod ang balaud dili gyud masayang ang ilang paningkamot nga lig-on gyud ang kasong mapasaka.
Samtang sa pikas nga bahin karong hinapos sa Mayo ning tuiga adunay ipahigayong National Drugs Summit kini human usab si Presidente Gloria Macapagal Arroyo niuyon na sa gisugyot ni DDB Chairman Vicente “Tito” Sotto atol sa ilang pagduaw sa presidente didto sa Malacañang niadtong Marso 23 ning buwana.
Matud pa niini nga giduso ni Sotto ang National Drugs Summit kini aron usab maumol karong tuiga ang Special Drugs Courts nga adunay tulo ka mga huwes ang molingkod nga mohusay sa kaso ra sa ilegal nga drugas. - BANAT NEWS