CEBU, Philippines - Patay nang nakit-an sa anak nga gikan mitambong og graduation ang iyang inahan nga nagbitay na sa hagdanan sa ilang balay pasado alas-3 sa hapon sa miaging adlaw sa dalan B. Aranas barangay San Nicolas Proper ning dakbayan.
Si Marcelina Catalya alyas Lynlyn, 32, usa ka therapist napalgang patay nga dunay cable wire nga gihikot sa liog ug nagbitay sa hagdanan.
Ang kamagulangang anak ni Catalya nga 6-anyos ug mao pay pag-uli gikan mipaso sa iyang graduation sa Kinder 2 maoy nakakita kaniya nga wala nay kinabuhi.
Gidali unta kini og tabang sa mga silingan apan patay na gyud kini sanglit migahi na ang lawas niini.
Sa pakisusi sa kapolisan sa lawas walay nakitang timailhang may foul play sa kamatayon niini.
Matud pa ni SPO1 Henry Orbiso sa pakighinabi sa Banat News nga ilang pagduda nga dunay problemang personal si Catalya tungod kay sa wala pa kini mapalging patay nag-away kini ug iyang bana.
Gisusi pa usab karon sa kapolisan ang report nga mabdos og duha ka bulan si Catalya. - Lesley Caminade (BANAT NEWS)