CEBU, Philippines - Gimando ni Governor Gwen Garcia ang pagpa-undang sa giingong “back door negotiation” tali sa siyudad sa Sugbu ug sa probinsiya sa Sugbo nga nagtinguha sa paghilot sa panagbangi tali ni Cebu City mayor Tomas Osmeña ug sa gobernadora.
Matud pa ni Capitol consultant on Information and Revenue, Atty. Rory Sepulveda nga si Gov. Garcia mimando kaniya nga dili na ipadayon ang maong memorandum of Agreement nunut sa pagbulgar sa mga opisyales sa siyudad sa Sugbu sa sekretong kasabutan.
Si Sepulveda nitumbok nga ang gobernadora nagduda sa motibo sa mga opisyales sa siyudad sa pagbulgar sa maong kasabutan.
Gihulagway niini nga ang gihimo sa siyudad nagpakita lamang sa nukos-nukos nga baruganan sa siyudad.
Tungod niini, miturok ang ilang pagduda nga igo lamang giilad ang mga opisyales sa probinsiya aron dili ipadayon ang pagbabag sa Kapitolyo sa joint venture agreement tali sa siyudad ug sa Filinvest Land Inc. sa pag-develop sa kapin sa 50 ka ektaryang lote sa South Road Properties kon SRP.
Dugang pa ni Atty. Sepulveda nga ilang ipadayon ang ilang sunod nga lakang ilabina nga nadawat na nila ang kopya sa orihinal nga kasabutan sa siyudad ug sa Filinvest. - Chester Abadilla ug Rey Pasaporte (BANAT NEWS)