CEBU, Philippines - Andam mosuporta si Kongresista Benhur Salimbangon sa ikaupat nga distrito sa lalawigan kang Kongresista Eduardo Gullas sa unang distrito, sa pagbabag sa tinguha sa National Power Corporation (NPC) nga mopatuman og usbaw sa bayranan sa kuryente sugod sa Abril.
Kini sa dihang mipadayag si Gullas og pagsupak sa P1.14 matag k/hour nga umento sa prisyo sa kuryente sa NPC nga isuplay ngadto sa Visayan Electric Company (VECO) ug uban pang power supplier dinhi sa lalawigan.
Gihulagway ni Gullas nga usa ka binuang ug di makiangayon ang tinguha sa NPC nga pagpausbaw sa bayranan sa kuryente taliwa sa global crisis nga nasinati karon sa katawhan.
Midason si Salimbangon nga dili maayo nga umentohan ang presyo sa kuryente dinhi sa Sugbo kay mas mahal ang kuryente dinhi kung itandi didto sa kaulohan.
Nidugang siya nga magtambayayong sila si Kongresista Gullas pag-awhag sa mga kaubanan nila sa Kongreso nga suportahan ang usa ka petisyon nga ilang iduso ngadto sa hawanan sa Kongreso aron babagan ang dili maayong lakang sa NPC. - BANAT NEWS