CEBU, Philippines – Pulos kritikal ang kahimtang sa drayber ug angkas niini sa motorsiklo human madasmag sa railings sa kilid sa dalan ug natagak sa walog sa Poblacion sa lungsod sa Sibonga niadtong Domingo sa alas 12:00 sa udto.
Ang drayber giilang si Reynaldo Tangub, taga barangay Sangat lungsod sa San Fernando samtang ang pasahero niining talandugon ang kahimtang mao si Nicomedes Plando, 31, residente sa samang lugar.
Matud pa ni PO3 Niñno Ibo sa Sibonga Police Station sa dihang nahinabi sa Banat News nalabay gikan sa motorsiklo si Plando ug nabunal ug nasalay sa punoan sa kahoy hinungdan sa mas grabeng kadaut sa kalawasan nga nahiaguman kumparar kang Tangub.
Sumala pang Ibo gikan sa lungsod ang duha paingon unta sa dakbayan sa Sugbo apan paghiabot sa kurbadahung bahin sa maong karsada nawad-an og preno ang motorsiklo.
Ang drayber midasmag sa iyang motorsiklo sa puthaw nga railings apan nalahos sila og kahulog sa walog nga gibana-banang may gilawmong napulo ka tiil.
Matud pa ni PO3 Ibo sa pag-abot sa mga polis sa maong lugar gidala na sa laing habal-habal driver si Tangub ngadto sa tambalanan ug ang mga polis na maoy mitabang pagpakanaog sa nasalay nga si Plando ug gidala sa tambalanan.
Sa paghimo ning balita gikatahong nagpabilin pa sulod sa intensive care unit kon ICU sa usa sa mga pribadong tambalanan dinhi sa dakbayan ang maong angkas. –BANAT NEWS