CEBU, Philippines - Dakong sagpa sa Ombudsman Visayas ang pagbasura sa Sandiganbayan sa kaso batok sa kompaniyang mi-supply sa kontrobersyal nga mga decorative lampposts nga gitarok sa kadalanan sa dakbayan sa Sugbo, Mandaue ug Lapulapu niadtong pagpahigayon sa 12th ASEAN Summit.
Kini ang gipadayag ni Antero Cana, tigpamaba ni kanhi Mandaue City Mayor Thadeo Ouano nga usa sa giimbestigahan ug napawalay sala sa mao gihapong kontrobersiya.
Ang Sandiganbayan Second Division niadtong miaging adlaw mibasura sa kaso human ang mga state prosecutor sa Sandiganbayan wala makakita og ebidensiyang maglambigit kang Isabelo Braza, presidente sa Fabmik Construction nga maoy supplier sa mga decorative lampposts sa pagpaburot sa presyo sa maong mga lampposts.
Ang pag-ulbo sa kontrobersiya namugna tungod sa whistleblower nga si Crisologo Saavedra nga miresulta sa pagpasaka og kaso batok nila ni Mayor Ouano, Mayor Arturo Radaza sa Lapulapu ug mga opisyal sa Department of Public Works and Highways (DPWH) sa Region 7, ang tanan pulos na-clear sa maong kaso human masuspenso og unom ka buwan.
Si Cana nagkanayon nga pabilin ang ilang pagtuong “sacrificial lambs” ang mga opisyal samtang ang mga tinuuray nga nakasapi niini didto sa kaulohan padayong gawasnon sa tulubagon. – BANAT NEWS