CEBU, Philippines - Ang pagkanselar sa prangkisa maoy labing bug-at nga ipahamtang nga silot ngadto sa mga operator sa PUJ nga sakyanan kun kapamatud-an ang panagkunsabo sa ilang mga drayber nga mihimo og kalit kaayong paghunong sa pagpamasahero niadtong Lunes nga nakahatag og kalangan sa mga sumasakay nga motambong sa ilang trabaho.
Si Land Transportation Franchising and Regulatory Board (LTFRB) 7 Director Romulo Bernardes miingon nga sa ilang pakisusi ilang nasuta nga adunay 13 ka mga operator nga nagbiyahe sa nagkadaiyang dapit dinhi sa Sugbu mipahunong sa pagpa biyahe sa ilang PUJ hinungdan sa pagka-stranded sa liboan ka mga pasahero.
Hinuon ang mga drayber nga sakop sa Nagkahiusang Drayber sa Sugbo (NADSU) sa dihang nahinabi sa Banat News hugtanong miinsister nga dili transport strike ang ilang gihimo sa miaging Lunes.
Gipasabot nila nga ang wala pagpamasahero nilang mga drayber sa PUJ niadtong Lunes mao lamang ang ilang pagpakita sa ilang panaghiusa alang sa pagpadangat sa ilang reklamo batok sa LTO.
Matud pa nila nga bug-at na kaayo alang kanilang mga drayber ang hilabihang kataas sa multa sa mga kalapasan sa lagda sa trapiko nga naglakip sa disregarding traffic sign, no stopping, no entry, no U turn ug uban pa nga mokabat na sa P1,500 ngadto sa P5,000 ang balayranan niini.
Si Bernardes mipasabot nga walay gahum ang iyang buhatan sa LTFRB 7 sa pagkanselar sa prangkisa sanglit ang board sa ulohan nilang buhatan ang adunay gahum niini. – BANAT NEWS