CEBU, Philippines - Tungod lang sa away sa kabilin nga yuta sa pamilya, gitigbas patay sa manghod ang maguwang niining babaye nga maoy nagtikad sa ilang kabilin nga yuta didto sa Sitio Panliwad-on, barangay Captain Claudio, siyudad sa Toledo niadtong Martes sa alas 2 sa hapon.
Ang biktima nga patay dihadiha human makaangkon og daghang samad tinigbasan sa kalawasan mao si Jovencia Segovia Henol, hingkod ang panuigon, minyo, samtang ang suspek mao ang iyang kaugalingong manghod nga si Felipe Segovia, 34, minyo ug manghod sa biktima nga pulos molupyo sa nahisgutang lugar.
Matud ni PO3 Jerson Lebumfacil sa Toledo City Police Station sa dihang nahinabi sa Banat News subay sa blotter nga gibasehan niini sa wala pa ang hitabo namatikdan sa mga silingan ang magsuon nga biktima ug suspek nga nagkalalis tungod sa kabilin nilang yuta nga gi-uma sa biktima. Apan paglabay sa pipila ka mga gutlo gitigbas-tigbas sa makadaghang higayon sa suspek ang maguwang niining babaye hangtod nga natumba ug namatay diha diha.
Matud ni PO3 Lebumfacil daghang mga samad tinigbasan sa kalawasan ang biktima nga natabastabas gamit ang hait nga sundang sa suspek ug pagkahuman boluntaryo dayong mitahan sa iyang kaugalingon ngadto sa miresponde nga tanod nga si Rodencio Altaribu.
Ang suspek nagtingkagol na karon sa detention cell samtang nagpaabot sa tukmang kaso nga ipasaka batok niya.
Namatikdan sa mga silingan nga kanunay nga mag-away ang biktima ug suspek tungod sa kabilin nga luna niini nga gi-uma sa biktima nga gikasuko og maayo sa manghod nga suspek. - Darrel A. Carumba (BANAT NEWS)