CEBU, Philippines - Usa ka 14-anyos nga lalaking giingong sakop sa gang ang namatay ug laing 16-anyos nga babaye ang naangol dihang gipamusil samtang nanuroy sa Sta. Lucia barangay Poblacion Oriental lungsod sa Consolacion niadtong Lunes sa alas 9:50 sa gabii.
Ang namatay giilang si Ronald Pacquiao Sagaysay, 14-anyos ug molupyo sa Upper Jagobiao siyudad sa Mandaue samtang naangol sab ang kauban niining babayeng 16-anyos, nga taga Pit-os siyudad sa Sugbo nga giingong pulos sakop sa gang.
Matud ni PO1 Winston Magdadaro sa Consolacion Police dihang nahinabi sa Banat News duha ka mga wala mailhing lalaki ang miduol sa duha dayon kalit pusil kanila.
Si Sagaysay naigo sa bukobuko ug maoy hinungdan sa hinanali niining kamatayon samtang ang kauban niini naigo sa tuong bukton ug gidala sa Eversely Child Sanitarium Hospital sa Jagobiao, Mandaue apan gibalhin sa Vicente Sotto Memorial Medical Center (VSMMC).
Ang kapulisan naka-recover og deformed slug sa kalibre .38 sa crime scene.
Ang kapulisan padayun pa sa ilang imbestigasyon pagtumbok sa mga suspek ug ang motibo sa krimen, gidudahan nga may kalambigitan sa gang war ang nahitabo sa duha. - Darrel Carumba uban sa report ni Bong Soriano (BANAT NEWS)