CEBU, Philippines - Naangol ang pito ka mga tawo dihang nagkadinasmagay ang duha ka mga sakyanan sa dalan A.S. Fortuna sa barangay Bakilid, dakbayan sa Mandaue alas 7:00 pasado ang takna sa miaging gabii.
Si SPO1 Eduardo Flores, imbestigador sa traffic section sa Mandaue City Office (MCPO) miila sa mga angol nga sila si Edna Canete, 44 , Darrel Fegurracion, 20, taga Ibabao Estancia, ug lain pang upat ka mga kauban niining pasahero.
Si SP01 Flores miingon nga nagluwan ang mga biktima sa Isuzu pick up nga gimaneho ni Atellano Bongo, 42, nga taga Cabancalan, dakbayan sa Mandaue paingon sa Banilad, dakbayan sa Sugbo, dihang ang sakyanan nga gimaneho ni Jerrymar Borbon, 37 , minyo, nga taga Banilad sa maong dakbayan, gikasugat niini ug nagkadinasmagay ang duha ka sakyanan.
Gidala dayon ngadto sa Mandaue City Hospital ang mga biktima ug gitakda na sa kapolisan ang imbistigasyon nga ilang himoon ngadto sa duha ka drayber aron maila ang sad-an ug manubag sa mga naangol nga pasahero. - BANAT NEWS