CEBU, Philippines - Nakatag ang utok sa usa ka off-duty nga security guard human kini malabay gikan sa iyang motorsiklong nadasmag sa gamay’ng poste alas 6:45 sa buntag kagahapon duol sa utlanan sa Gate-7 ug Gate 6, service road sa Pier 2 ug 3.
Si Corporal Vincent Hirro Hermocilla, Port Police kinsa mi-responde sa dapit nga nahinabi sa Banat News miila sa namatay nga mao si Elmo Rofitana, 37, sakop sa Kampilan Security Agency nga magbantay sa pantalan ug taga barangay Lorega-San Miguel ning dakbayan sa Sugbo.
Matud pa ni Hermocilla, kusog ang pagpadagan sa biktima sa gimanihong motorsiklo samtang padulong gawas sa Gate 7 paingon sa Gate 6 apan pag-abot sa kurbadahong lugar nawad-an kini og kontrol sa manobela hinungdan nga misampak kini sa puthaw nga poste ug nalagpot og 12 ka metros.
Tungod sa kakusog sa pagbangga ug gilay-on sa gilagputan napantok ang ulo niini sa dalan ug namatay diha-diha ug wala na madala pa sa tambalanan. - Guam Logroño (BANAT NEWS)