CEBU, Philippines - Usa ka konsehal sa dakbayan sa Toledo nalakip sa katapusang batch sa government officials ug empleyado nga naaktuhan sa mga elemento sa “Oplan Red Plate” Task Force sa buhatan sa Visayas Ombudsman nga migamit og sakyanan nga isyu sa gobiyerno sa personal nga katuyoan.
Apan gipugngan lang una sa naasoy'ng buhatan ang ngalan ug apelyedo sa maong konsehal samtang adunay gihimong imbestigasyon. Giingong naaktuhan kining nangompra sa usa ka convenience store diha sa lungsod sa Minglanilla uban ang iyang pamilya ug pribadong drayber dala ang sakyanan sa gobyerno nga pula ang plate number niini.
Ang maong konsehal nalakip na sa 15 ka laing opisyal sa gobeyerno ug empleyado nga nag-atubang og imbestigasyon sa buhatan sa Ombudsman Visayas tungod sa giingong illegal nga paggamit sa sakyanan nga iya sa gobiyerno.
Si Deputy Ombudsman for the Visayas Pelagio Apostol mitug-an kagahapon nga atol sa ilang sinemanang radio program sa sibyaanang DyLA “Giyera batok sa Korupsyon” moabot na ngadto sa 71 ka opisyal ug empleyado sa gobiyerno naaktuhan sa Task Force nga ilegal migamit sa mga sakyanan sa gobiyerno.
Gibutyag ni Ombudsman director Carla Tanco nga sa 71 ka kaso ila na kining gi-docket alang sa fact-finding investigation. Lima niini gi-upgrade na ngadto sa formal administrative adjudication.
Ang lima nag-atubang na karon og pormal nga kasong administratiba nga misconduct, usa na niini mao si kanhi regional director sa Bureau of Immigration dinhi sa Central Visayas Reynaldo Almaden.
Matud ni Tanco ilang nasuta sa fact finding investigation nga duna gyuy lig-ong basehan nga upgrade ang investigation ngadto na sa formal criminal ug administrative nga kaso batok kang Almaden human siya naaktuhan sa Oplan Red Plate Task Force diha sa Ayala Mall nga migamit og sakyanan nga iya sa gobiyerno nga atol sa dili tingtrabaho.
Apan ang kasong criminal hinuon wala aprobahi ni Assistant Ombudsman Virginia Palanca Santiago tungod kay giingong wala gyud mahibaw-i pila ang damage sa gobiyerno sanglit nasuta nga walay trip ticket si Almaden.
Mipasabot si Tanco dili nila ma-verify pila ka litro nga gasoline ang nagamit ni Almaden sa iyang paggamit og sakyanan sa gobiyerno. – BANAT NEWS