CEBU, Philippines - Nagsugod na pagpangandam ang Cebu City Agriculture Office sa ting-init nga gipaabot nga masinati sa tibuok kapupud-an lakip na dinhi sa Sugbu.
Matud ni City Agriculturist Joelito Baclayon nga angayan lang sila nga mangandam aron dili kaayo maapektahan sa huwaw ang mga mag-uuma sa bukirang mga barangay sa siyudad.
Kini sama sa pagpalit nang daan sa mga hose, drum, ug ubang gikinahanglan pagpundo og daghang tubig nga gihangyo sa mga mag-uuma.
Gawas niini miingon si Baclayon nga magpagahin usab sila og pundo sa City government alang sa pag-ugmad og dugang water sources sa kabukiran.
Nagkanayon si Baclayon nga aduna sila’y nakitang mga tinubdan sa tubig sa pipila ka mga bukirang barangay sama sa Lusaran, Paril, Cambinocot, Budlaan ug uban pa.
Dugang sa City agriculturist nga nanginahanglan usab sila og gahin alang sa pagpang-ayo sa ubang tinubdan sa tubig nga gisaligan sa mga mag-uuma.
Lakip sa pananom sa mga bukirang barangay sa siyudad nga sagad maapektahan panahon sa ting-init mao ang mga buwak, utanon, lagutmon ug uban pa. (Elly Bolonos) (BANAT NEWS)