CEBU, Philippines - Gihangop ni Cebu City Agriculturist Joelito Baclayon ang disisyon sa nasudnong kagamhanan pag-ban na sa endosulfan.
Nakontrobersyal ang nahisgutang pesticide dihang kini gisakay ug nalakip pagkalunod sa M/V Princess of the Stars niadtong miaging tuig.
Matud ni Baclayon nga swerte na lang nga ang endosulfan nahaw-as ug wala mo-leak tungod kay kini giingong makadaut sa may kinabuhi ilawom sa dagat.
Ang endosulfan nga usa ka pesticide nga makahilo gigamit batok sa mga dangan sa mga tanom partikular na sa dagkong mga plantasyon sa saging ug pinya.
Nasayran nga si Environment Secretary Lito Atienza maoy nimando pagdili na paggamit sa nahisgutang pesticide tungod sa giingong ka dilikado niini.
Ang endosulfan una nang gidili dinhi sa nasud niadtong 1993 apan human sa duha ka tuig, kini gilibkas ra tungod sa dangan nga nakahulga sa pineapple industry.
Apan matud ni Baclayon nga angayan nang idili ang paggamit sa endosulfan tungod kay kini giingong dili lang makadaut sa tawo kundi lakip na sa kalikupan.
Gipadayag sa City agriculturist nga duna nay daghang green label chemical karon nga gipamaligya nga mahimong gamiton hulip sa endosulfan.
Gitataw hinuon ni Baclayon nga siya wala makadungog nga dunay mga mag-uuma sa siyudad nga migamit og endosulfan sa ilang umahan. - Elly Bolonos (BANAT NEWS)