CEBU, Philippines - Mga sakop sa Talisay City Divers kinsa nagbutang og boya diha sa Lagundi Reef sa barangay Poblacion, dakbayan sa Talisay ang diriyot madisgrasya dihang usa ka cargo ship ang misangad sa maong lugar ug miguba sa mga gasang kagahapon sa buntag.
Ang United Majuro, usa ka bulk carrier nga dunay 31,643 gross tonnage nga narehistro sa Athens, Greece nasangad sa 20 ka tiil nga giladmon sa maong sanctuary, ang mga tripulante sa maong barko pulos nga Tsino.
Ang kapitan sa maong barko nga si Chen Guang Meng dihang gihinabi sa Banat News mitug-an nga wala siya masayod nga usa ka marine sanctuary ang ilang gipundohan ug nagdahom usab kining sakop pa sa pwerto sa dakbayan sa Sugbo ang maong dapit.
Si Anthony Nator usa sa mga diving instructor ug sinaligan sa dakbayan mibutyag kagahapon sa Banat News namutang sila og mga boya sa nahisgutang fish sanctuary pangandam sa re-launching sa Lagundi Reef karong Marso 25, 2009 dihang kalit misangad ang barko sa ilang gihimutangan.
Matud pa ni Nator nagwara-wara pa sila sa ilang mga bukton pagsenyas nga pabalikon sa agi ang barko apan pakyas kini hinungdan nga gipadali niya og pasaka sa pumpboat ang mga kaubang divers aron dili mahigop sa propeller.
Matud ni Nator halos katunga sa coral garden nga dunay gilapdon nga usa ka ektarya ang gidaro sa maong barko diha sa ilawom naguba niini.
Si Raul Galope, boarding officer sa Wallen Philippines Shipping Inc. dinhi sa Sugbo nga maoy agent sa barko nga nahinabi sa Banat News nagkanayon gipadagan sa kapitan ang maong barko aron mopundo.
Gikatahong ang harbor pilot (ngan wala makuha) mikanaog na diha sa Lawis, barangay Pasil ning dakbayan, si Galope nagkanayon nga ang maong barko nagpaabot pa sa mapa nga mogiya sa ilaha padulong sa Indonesia.
Base sa ordinansa 2006-04 sa dakbayan nga magpreserba sa Lagundi Reef ug sa kadagatan sa siyudad ug may silot nga P5, 000.
Si Meng mikuyog kang Nator ug mga polis alang sa imbestigasyon kabahin sa maong hitabo.
Si Petty Officer 2 Primo Locot sa Philippine Coast Guard sa pakighinabi sa Banat News kagahapon nagkanayon nga mopahigayon pa sila og imbestigasyon sa maong hitabo.
Si Konsehal Shirley Belleza kinsa tsirman sa tourism and heritage council mibahad nga pasakaan nila og kaso si Meng tungod kay dili modawat sa rason ang siyudad nga aksidente ang nahitabo tungod kay ang mga divers mipahibalo kanila nga di paagian ang lugar.
Kagahapon gisusi og balik sa mga divers ang sanctuary aron pagtino sa kinatibuk-ang danyos sa ilawom. – BANAT NEWS