CEBU, Philippines - Gidakop sa kapolisan ang usa ka taxi driver nga gipasanginlang midagit sa iyang hinigugma nga asawa og Australyano, niadtong miaging gabii gawas sa usa ka mall ning dakbayan.
Si Jimmy Amen, 31, taga Villagonzalo I apan lumad nga taga Catarman, Samar, nasikop uban sa hinigugma niining si Carin Kenny, 32, taga dalan Urgello sa Sambag I apan asawa sa Australyano nga security guard.
Ang Australyano nga si Shawn Paul Kenny, 41, midangop sa kapolisan tungod sa pagkahanaw sa iyang asawa nga si Carin.
Si Cebu City Police Office director Patrocinio Comendador miingon nga unang na-report ang alarma nga kidnapping.
Si Comendador mimando sa hepe sa Investigation and Detective Management Branch nga si Chief Insp. George Ylanan sa paghimo og operasyon hinungdan nga gilusad ang entrapment operation sa gawas nga bahin sa Robinson’s Place.
Atol sa operasyon kagahapon sa alas 11 sa buntag, si Amen ug Carin hinuon ang nasikop sa kapolisan. Laing usa ka kauban naka-eskapo.
Si Amen mihimakak nga iyang gidagit si Carin. Giangkon hinuon niya nga nagka-relasyon siya ug ni Carin apan kagahapon lang nasayod nga minyo na diay si Carin ug si Shawn.
Matud niya nga si Carin maoy kanunay’ng nagpadad-anan og text messages ngadtong Shawn Paul.
Si Carin nga miangkong naka-relasyon si Amen, miangkong siya'y tigpadad-anan og text message ngadto sa iyang bana nga Australyano, apan ang iyang gipangayo nga kuwarta para ibayad sa iyang utang.
Nakurat na lang siya sa dihang apil siya sa gidakop.
Si Ylanan mihulam sa cellphone ni Shawn Paul ug gipakita sa media sa usa sa daghang mga mensahe nga gipadala sa nagpailang kidnapper nga nagkanayon: “Sori friend, you can’t see ur wife we will torteor her. Just send her credits to us of P15,000 or not see, hear your wife. Sorry if we do it in your wife. She is crying now. Deal or no deal. No time must do if if you love your Carin.” Napadala kini gamit ang cellphone ni Carin.
Ang Australyano sa iyang bahin nagkanayon nga wala na siya'y tinguha sa pagkiha ni Carin ug sa taxi driver. “All I want is to get my wife back,” matud pa niini.
Si Comendador miingon nga gitun-an nila karon ang posibleng pagpasaka og kasong pagpangilad batok ni Carin, bisan wala nay interes ang bana nga Australyano. – BANAT NEWS