CEBU, Philippines - Pormal nga gideklarar sa kanhi presidente sa nasud Joseph "Erap" Estrada si Mayor Jejomar "Jojo" Binay nga sunod presidente sa nasud.
Si Estrada mideklarar mi Binay nga kandidato pagka-presidente sa dihang namulong kini atubangan sa bagang duot sa katawhan sa lungsod sa Compostela nga mga dumadapig ni Mayor Ritchie Wagas.
Gibutyag ni Estrada ang lahi nga klase nga pamolitika nga gisagop ni Binay nga haum usab kaayo nga mahimong haligi sa nasud.
Unang miduaw si Estrada sa lungsod sa Carmen, dayon sa Compostela, Liloan ug Consolacion.
Si Binay mao karon ang presidente sa United Opposition.
Matud pa ni Estrada nga si Binay nakahatag og dako nga kalambuan sa dakbayan sa Makati sa iyang pagdumala. Ang Makati maoy commercial district sa nasud.
Hinoon, sa dihang gihinabi sa mga tigbalita, si Estrada miingon nga kun dili magkahiusa ang oposisyon mahimong siya na lang ang modagan pagka-presidente sa piniliay sa 2010.
Gani sa iyang panahon iyang gipakita ang grabe nga paglambo sa dakbayan sa Makati. Nahatagan usab sa maayong serbisyo ilabi na gayud ang mga senior citizens.
Gipasalamatan usab ni Estrada ang mga Sugbuanon nga kanunay nagpaluyo kaniya bisan pa man kun siya didto pa sa bilanggoan.
Giangkon sa kanhi presidente nga una kining higayon nga siya miduaw sa Sugbo human siya makagawas sa bilanggoan sulod sa taud-taod nga panahon.
Ang pagduaw ni Estrada sa Sugbo kabahin sa iyang gihulagway nga "lakbay pasasalamat ni Erap.”
Subli usab niya nga gipanghimakak nga nakasala siya sa nasud hinungdan sa iyang pagkabilanggo.
Gipasabot niya nga biktima lamang siya sa pakigkomboya sa pipila ka mga sakop sa militar, simbahan, mga negosyante ug uban pa nga nagpaluyo niini.
Gipahibawo usab niya nga ang iyang pagkanaog dili tungod kay siya sad-an kun dili gusto niya nga walay dugo nga mobanaw ug ang mga kabus nga katawhan maoy mabiktima.
Ang kanhi presidente mibutyag usab sa tanyag nga gihimo ni kanhi DOJ Secretary Hernando Perez nga ihatag kaniya ang tanan ug walay kaso nga isang-at kun mopirma siya nga dili na siya presidente.
Apan wala niya dawata ang tanyag ug mao kini ang iyang gihulagway nga hinungdan sa iyang pagkabilanggo.
Samtang sila si Mayor Sonia Pua sa Carmen, Mayor Rogelio Baquerfo sa Tudela, Mayor Vincente Franco "Duke" Frasco sa Liloan ug Mayor Avelino Gungob sa Consolacion ug Mayor Wagas sa Compostela mihangop ni Estrada ug Binay.
Sa Liloan si Estrada mipasalig og P20 milyones nga ayuda alang sa katukoran sa merkado publiko sa maong lungsod.
Uban ni Estrada ug Binay mao sila si Manlalaban Ade Tamano, Gina De Venecia, Grace Poe nga anak ni Fernando Poe, Ernesto Maceda ug Rex Cortez. – BANAT NEWS