CEBU, Philippines - Nagtingkagol sa karsel sa kapulisan sa lungsod sa Compostela si John Lennon (dili bokalista sa Beatles) human kini madakpi sa kapulisan dihang nanglabni og cellphone sa usa ka nursing student niadtong Biyernes sa alas-singko sa buntag sa National Road sa barangay Poblacion sa nahisgutang lungsud.
Ang akusado giilang si John Lennon Pepito, 25, taga sitio Paradise Village barangay Poblacion human iyang gi-snatch ang cellphone sa biktimang si Lourie Fe Parohinog 19, dalaga, second year student sa kursong nursing sa University of Cebu ug nagpuyo sa nahisgutang lugar.
Ang biktimang si Parohinog nagpaabot og masakyang jeepney paingon sa dakbayan sa Sugbu dihang kalit nga giduol sa suspek ug gilabni ang cellphone niining mokantidad og P3,200.
Sa gihimong follow-up operation sa kapulisan tungod sa reklamo sa inahan sa biktima nga si Fernah Parohinog nadakpan ang akusado ug narekober ang cellphone sa biktima nga gibaligya na niini sa dakbayan sa Danao sa kantidad nga P700.
Apan nadungagan ang kaso sa akusado human laing usa usab ka tinun-an sa Compostela Central School nga si Harvie Bantilan ang positibong miila kaniya nga mao say milabni sa iyang cellphone niadtong Pebrero 14 atol na sa Valentines Day.
Ang akusado kasamtangang gitanggong sa karsel sa kapulisan sa nahisgutang lungsod samtang gihikay pa ang tukmang kasong ipasaka batok niini. - Guam Logroño (BANAT NEWS)