CEBU, Philippines - Nakuha sa usa ka armadong tawo ang P6 mil gikan sa kahero sa litsonan sa manok nga gitulis niini didto sa Patalinhug Avenue, Brgy. Pajo, dakbayan sa Lapulapu sa milabay’ng gabii.
Ang biktima mao si Marlon Payahay Parayon, 23, ulitawo, nga taga Sitio Matumbo, Brgy. Pusok, dakbayan sa Lapulapu nga maoy cashier sa Xiong Soon litsong manok.
Si PO3 Manolito Abellanosa ug PO1 Meyquin Mingay sa Crime Against Property sa kapolisan sa Lapulapu mibutyag sa Banat News nga samtang didto sa sulod sa booth si Parayon, usa ka wala hiilhing tawo ang kalit nga miduol kaniya.
Sa pagtuo nga usa ka kustomer, gipasulod kini niya apan puwerting kurata sa biktima dihang milanit kini sa armas de fuego ug gition ngadto kaniya uban sa pagdeklarar nga tulis .
Gumikan sa kahadlok mitiurok ang biktima ug wala na kini kabalibad dihang gipangayo ang iyang halin nga mikabat sa P6 mil.
Human makuha ang iyang kuwarta misibat dayon ang maong tulisan ug wala na kini hiabti sa kapolisan. (Bong Soriano) (BANAT NEWS)