CEBU, Philippines - Usa ang angol dihang usa ka tawo naghuramentado sulod sa diskohan didto sa Sitio Sangi, barangay Hagnaya, lungsod sa San Remegio niadtong miaging kaadlawon.
Ang biktima mao si Rutchito Muñez, hingkod, minyo, nga taga barangay Poblacion, samtang ang suspek mao si Froilan Labores alyas Keki, hingkod, ug silingan sa biktima.
Ang bagolbagol sa biktima hapit mapikas kay gigamitan og pinuti sa suspek nga mibugha niini.
Si PO2 Recardo Ancajas sa San Remegio Police Station mibutyag sa Banat News nga ang kagawad sa barangay Poblacion nga si Resnar Dela Peña maoy mipahibawo kanila sa maong hitabo.
Apan dihang miresponde sila nabungkag na ang gipahigayong disco ug gibayongan na ang biktima aron ihatod ngadto sa Don Severo Verallo Hospital.
Padayon pang gipangita karon sa kapolisan ang suspek kinsa misibat dayon human makatigbas. (BANAT NEWS)