CEBU, Philippines - Subling gipasidan-an sa Cebu City Traffic Operations and Management (Citom) ang mga drayber sa mga armored car sa Sugbu nga mosunod sa mga lagda sa trapiko.
Kini human makaobserbar ang mga sakop sa Citom board nga padayong milapas ang mga driver niini sa traffic rules and regulations.
Partikular nga mga traffic violations nga giingong sagad nalapas sa mga armored cars mao ang reckless driving ug disregarding traffic signs.
Ang executive director sa Citom nga si Arnel Tancinco nitataw nga ila nang gipahimangnoan ang mga armored car providers labot niini kaniadto apan misamot ka arogante ang mga drayber niini.
Usa sa mga reklamo sa mga enforcers nga mao ang kawalay pagtahod sa mga drayber kanila ug di gani mohunong kun parahon.
Tungod niini, nahukman sa mga sakop sa Citom board nga ipagukod sa Special Weapons and Tactics ang mga armored car nga makahimo og traffic violations.
“Nasabutan namo nga kung gikinahanglang ipagukod sa SWAT ang mga armored car nga makahimo og traffic violations, amo nang buhaton,” sumala ni Tancinco.
Matud ni Tancinco nga ang Citom mopagawas na og circular ngadto sa tanang traffic personnel nga dili exempted ang mga armored car sa mga lagda sa trapiko.
Gipasalig hinuon sa presidente sa Armored Car Providers Association of Cebu nga si Danny Rodis nga ipadangat ngadto sa iyang mga sakop ang pasidaan sa Citom.
Dugang niini niingon si Tancinco nga nipasalig usab kaniya si Rodis nga ipa-seminar sa Land Transportation Office (LTO) ang mga drayber sa mga armored car. (Elly Bolonos) (BANAT NEWS)