CEBU, Philippines - Ipaubos sa random drug test sa Police Regional Office (PRO-7) karong sunod semana ang mga sakop sa kapolisan dinhi sa Rehiyon -7 isip kabahin sa ilang pagpalig-on sa kampanya batok sa ilegal nga drugas.
Kini maoy gibutyag ni Chief Supt. Federico Terte, officer-in-charge (OIC) sa PRO-7 atol sa gipahigayong Talakayan sa Isyung Pulis kagahapong adlawa.
Matud pa ni Terte nga karong sunod semana mosugod siya’g suroy sa nagkadaiyang police units dinhi sa rehiyon ug mopahigayon sa kinalit nga random drug test sa kapulisan.
Sumala pa niini nga usa sa ilang kampanya nga mapalig-on ang ilang programa sa ilegal nga drugas mao ang paglimpiyo og una sa ilang mga sakop.
Gipadayag niini nga usa sa iyang tumong ug tuyo sa iyang termino isip hepe sa PRO-7 mao ang pagmando gyud sa iyang mga ginsakpan sa subsob nga kampanya sa ilegal nga drugas ingon man ang pagpadayon sa ilang kampanya sa insurgency program sa Central Visayas, diin mao usay tumong ni Presidente Gloria Macapagal Arroyo nga mapapas ang maong problema sa 2010.
Subay niini, ang hepe sa kapolisan sa dakbayan sa Sugbu Sr. Supt. Patrocinio Comendador mibutyag nga sila sa CCPO permanente nang mopahigayon og kinalit nga random drugtest sa iyang mga sakop.
Gitug-an niini nga niadtong 2007 dunay 50 ka personnel ang iyang gipaubos sa random drugtest ug usa niini migawas nga positibo.
Samtang sa miaging tuig, laing 50 ka personnel ang gipaubos na usab sa random drugtest ug duha ang nasutang positibo.
Ang mga kaso sa maong mga polis naa na karon sa buhatan sa PRO-7 kinsa maoy mosilot niini.
Si Sr. Supt. Carmelo Valmoria sa iyang bahin mibutyag nga sa miaging tuig usa sa iyang mga sakop sa CPPO migawas nga positibo sa illegal drugs. (BANAT NEWS)