CEBU, Philippines - Pormal nang gisugdan sa mga sakop sa drug testing team ang random drug testing sa mga estudyante sa publiko ug pribadong tunghaan nga sekondarya sa dakbayan sa Mandaue kagahapong adlawa.
Ang team nga gikan sa Manila mihimo og courtesy call sa buhatan ni Mandaue City Mayor Jonas Cortes uban usab kang Undersecretary Paul Clarence Oaminal sa Dangerous Drugs Board , ug ni Division Superintendent Virginia Zapanta sa Mandaue City Division sa Department of Education.
Matud ni Zapanta nga human sa courtesy call gipahigayon dayon ang random drug testing diin napulo ka mga tinun-an gikan sa Mandaue City Science High School sa Ibabao, Mandaue maoy unang gipaubos sa drug test ug gisunod usab ang Mandaue Christian School.
Gibana- bana ni Zapanta nga mokabat pa og tulo ngadto sa upat ka adlaw una makompleto ang random drug testing sa tanang mga tunghaan sa dakbayan.
Ang Mandaue City dunay 19 ka mga high school sa publikong tunghaan, ug 10 ka mga pribadong eskuylahan.
Samtang gibutyag ni Atty. Oaminal sa Banat News nga moabot pa og duha ka semana una mahuman ang drug testing sa tanang mga publiko ug pribadong tunghaan dinhi sa Central Visayas tungod kay 561 ang katibuk-ang tunghaan dinhi sa rehiyon nga pahigayonan sa nahisgutang drug testing. (Darrel A. Carumba) (BANAT NEWS)