CEBU, Philippines – Mibahad si Kapitan Danilo Lim sa barangay Pardo ning Dakbayan sa Sugbo nga dili ug dili siya manaog sa iyang katungdanan gawas lang kung makapakita og writ of execution gikan sa Commission on Elections (COMELEC) Manila ang buot mohulip kaniya sa katungdanan.
Kini tungod kay nagtuo si Lim nga ang Comelec Manila lang ang bugtong may katungod nga mopalingkod kang Fermin Dasmariñas sa katungdanan isip bag-ong kapitan sa Pardo.
Apan napanglantawan sa mga tigpaniid nga posibling mag-atubang unya og problema ang paghatag og suhol ngadto sa mga empleyado sa Pardo, kun moinsister si Lim sa pagpirma sa mga voucher ug payroll sa mga kawani.
Nasayran nga ang giila karon ni acting mayor Michael Rama nga barangay kapitan sa Pardo mao na si Dasmariñas.
Kini dihang giinstalar si Dasmariñas niadtong miaging semana sa sheriff sa korte ug sa Department of Interior and Local Government (DILG), kay nakakuha kini og writ of execution gikan sa hukmanan.
Apan matud ni Lim nga gawas lang kung ang Comelec Manila maoy moluwat sa maong writ of execution alang kang Dasmariñas, dili ug dili gayud siya manaog sa iyang katungdanan.
Matud pa ni Lim nga dili korte ang nagkupot ning maong kaso , kundili ang Comelec Manila, busa ang maong ahensya mao lamang ang bugtong may katungod sa pagluwat sa hustong desisyon.
Miluwat og writ of execution ang korte human ibasura sa Comelec-Manila ang appeal ni Lim sa election protest nga gipasaka ni Dasmariñas nga gipaboran sa lower court.
Apan alang kang Lim nga wala pa mahuman ang ilang kaso tungod kay siya miduso pa og motion for reconsideration sa desisyon sa Comelec-Manila. (Elly Bolonos) (BANAT NEWS)